ജമാഅത്തെ ഇസ്‌ലാമിയെപ്പോലെത്തന്നെ സുന്നികളും, അറിയാതെയാണെങ്കിലും, ഈസാനബി(അ) മരിച്ചു പോയിരിക്കുന്നു എന്ന ഖുര്‍‌ആനിക സത്യം എഴുതിപ്പോയിട്ടുണ്ട്. സുന്നികളുടെ അനിഷേധ്യ നേതാവും അമരക്കാരനുമായ സാക്ഷാല്‍ ഏ. പി അബൂബക്കര്‍ മുസ്‌ലിയാര്‍ 2007 ഫെബ്രുവരി 8-24 ലക്കം 'മാതൃഭൂമി'യില്‍ എഴുതിയ 'ആള്‍ദൈവങ്ങള്‍ ഇസ്‌ലാമിക വീക്ഷണത്തില്‍' എന്ന ലേഖനത്തില്‍ എഴുതുന്നു:
'വിഗ്രഹാരാധനയേയും ബഹുദൈവാരാധനയേയും രാജഭരണകൂടങ്ങളുടെ അപ്രമാദിത്തവാദത്തേയും ചോദ്യം ചെയ്ത ഈസാ (അ)നെ മരണശേഷം അനുയായികളില്‍ വലിയ വിഭാഗം ദൈവപുത്രനാക്കി' (മാതൃഭൂമി 2007 ഫിബ്രവരി 8-24)
ഏറ്റവും കൂടുതല്‍ അനുയായികളാല്‍ ആരാധിക്കപ്പെടുന്ന ആള്‍ദൈവമായ ഈസാനബി(അ)യുടെ ദൈവത്വം ഇല്ലാതാക്കാന്‍ അദ്ദേഹം മരിച്ചുപോയി എന്നു പറയലാണ്‌ ഏറ്റവും ശക്തവും ഫലപ്രദവുമായ വഴിയെന്ന്‌ ഉസ്താദവര്‍കള്‍ തിരിച്ചറിഞ്ഞിരിന്നു. ഏറ്റവും വലിയ ശിര്‍ക്കിനെതിരെയുള്ള ആഗോള പോരാട്ടത്തില്‍ മുസ്‌ലിംകള്‍ ഉയര്‍ത്തിപ്പിടിക്കേണ്ട ഏറ്റവും പ്രബലമായ വാദമുഖവുമിതാണ്‌. ഇതാണ്‌ റസൂല്‍ തിരുമേനി(സ)യുടെ മാര്‍ഗ്ഗം. റസൂല്‍ തിരുമേനി (സ) ക്രിസ്ത്യാനികളുമായി നടത്തിയ ഒരേയൊരു സംവാദം ഇസ്‌ലാമിക പ്രമാണങ്ങളില്‍ രേഖപ്പെടുത്തപ്പെട്ടതാണ്‌. സൂറ. ആലുഇംറാനിലെ എണ്‍പതോളം സൂക്തങ്ങള്‍ അവതരിക്കാനുള്ള സാഹചര്യം ഈ സംഭാഷണങ്ങളാണ്‌. നജ്‌റാനില്‍ നിന്നു വന്ന ഒരു സംഘം ക്രിസ്തീയ മതനേതാക്കന്‍മാരോട്‌ റസൂല്‍ തിരുമേനി നടത്തിയ സാരഗര്‍ഭമായ സംഭാഷണത്തില്‍ ഏറ്റവും അധികം ഊന്നിപ്പറഞ്ഞത്‌ ഈസാനബി(അ)യുടെ നശ്വരതയെയും അദ്ദേഹത്തിന്‍റെ മരണത്തെയും സംബന്ധിച്ചാണ്. ആ സംഭാഷണത്തിലെ ഭാഗങ്ങള്‍ ഇവിടെ ക്ലിക്കിയാന്‍ വായിക്കാം.
